-
Ay amadga inin iwetrit pis uti Uhokri Gannasan, akak Kagta Yuwitkekne akak Avatkekne akak kagta adahan lekkol akak arakembet akiw. Hiyawa pis ivegboha ku pariye pimawkan. Hiyawa pis biwhni.
SAWMUS: Ikivarat Davi gavanviyene
Sawmu 1
Ivegminene uhiyakemni takunipti amin
Uhokri gihiyakemni
1 Ka aynsima kabayka ay gidahan pahavwi ku pariye kane wew akak hiyeg gihiyakemnikis kane kabay, ine ig kawnata msakwa avigku gahinakis hiyeg taraksavye, ine ig kawnata bat gikakis neras ku pariye mahivwihnevwi Kiyavwiye Uhokri.
2 heneme ig batek ka aynsima akak Kiyavwiye Uhokri gannasan, ig ivegminene gihiyakemni amin Kiyavwiye Uhokri gihiyakemni mataytak hewke tiyegem. Ku gihiyakemni hene, ig uti ka aynsima kabaykanek.
3 Ig humaw kewa pahakti ahbe mutuhka akigbimna warik ku pariye sarayhnenekwa guw avanenekwa ku aysaw guhawkanavrik danuh, hawwata eg ka taraksatiy. Guvan hawwata avanenekwa ka miyavewtiy. Igi hiyeg hawwata. Madikte ku pariye gikehni in adahan kabaykanenwa.
4 Ignesme hiyeg taraksavye igkis ka hennama. Igkis kewa dugbe amar mihikuhka, kibehtenwa mayg pasuhni, in ka hiyapkan akiw.
5 Inneki keh aysawnemenek avim ini ku aysaw Kiyavwiye Uhokri gihiyvetnikis hiyeg ba igkis kibeynevwiwatma, avim ini igkis tukuhavepkanek. Igkis ka isaksakanek msakwa gibetkis hiyeg kibeynevwi.
6 Mmanawa ig Kiyavwiye Uhokri avuriw hiyeg kibeynevwi. Heneme hiyeg mbayavye gihiyakemnikis gidahankis biyukwiki.
Sawmu 2
Ka ik siguh Kiyavwiye Uhokri
1 Mmahki madikte hiyeg dagawnebdi git Kiyavwiye Uhokri? Mmahki igkis siguhpig? Mmahpaki hiyegviyenevwi ivegmina gihiyakemnikis hene waditnevyenen?
2 Madikte gikivarakis hiyeg amedgenevwi inin igkis ahegbete ginetnikis adahan siguhnekis Kiyavwiye Uhokri dehetniye. Madikte igkis ikivaratviyene tuguhkis gihiyakemnikis hehpekwiye adahan igkis kavetunsenekis Kiyavwiye Uhokri gikanyan adahan ukumaduketniwiy.
3 Igkis awna: “Uyay matisbete inin ku kakak Kiyavwiye Uhokri wanakminevwiy. Uyay watakminew ariw inin uwankamnihkawiy adahan wixwiy isahptew giw Kiyavwiye Uhokri.”
4 Igme Kiyavwiye Uhokri inurikyene, amadga gevwi kiyatyo, aytohtak inuriktak ig hiyaraptihgikis. Ig awna gitkis: “Kitki yis isahptaw nuwhu? Yis yuma yidatni adahan keh yivit isahptaw.”
5 Kuri avim inin igkis ka timap inakni giwn, heneme aysawnemenek igkis timapninek. Avim ini ig Kiyavwiye Uhokri awnanek inakni gitkis akak madikte gidagonyi. Ig akki gitkis ku ig ka batek akak gihiyakemnikis mbeyevyenen. Avim ini igkis avisnek ka aynsima, yuma aviska hene akiw.
6 Igme awna gitkis: “Kwis nah kaniye pahavwi adahan yikumaduketni. Kuri avim inin nah keh ig humaw yikivara ay avit inin waxri ndahan kewye Siyawh.”
7 Igme ner ikivarat awnanek gitkis: “Nah akkite yit ku pariye Kiyavwiye Uhokri dehetniye giwn nutuh. Ig awna nutuh: “Pisnewa nukamkayh. Kuri avim inin nah akkap ku pis igyewa nukamkayh.
8 Hiyawa pis aya nutuh ku pariye pimawkan. Nahme iki piwakurit madikte hiyegviyenevwi amadgaya inin. Nah iki pit madikte, niyesikeknen inin waxri, adahan igkis humaw pidahan.
9 Pis kumadukigkisnek madiktehkis akak pasuga sivari hawwata ku samah muwtohvutne kumaduka givigvu akak ah. Pis kadahan pidatninek adahan pisenwa gikakis taraksavye hawwata ku samah pahavwi batekerevutne bekbeta gibatkan ku pariye kane kabay.””
10 Pukuhpawnabay nikwe, yis ikivaratviyene amedgenevwi inin. Avuriwnabay yihiyakemni adahan yis ka taraksa.
11 Kiyathanabay Kiyavwiye Uhokri dehetniye akak yavisni. Kiyathanigbay akak madikte kiyatka.
12 Kehnabay Kiyavwiye gikamkayh gibetki. Ku ka hennama, ig dagawnenek yit. Nikwe pahaye adahan ig ehwenek yikak, ig padekweynek arimkanit biyukwiki. Wis ka hiyak aysaw ig padakwi. Heneme ku wis avuriswa git, ig keh wis uti kabaykanenwa.
Sawmu 3
Uhokri keh nah ka matak gitkis nuvetunyavu
1 Kiyavwiye, ka aynsima nuvetunyavu kibihwe! Igkis ku pariye wageswebdi nutivut ba gikebankisten!
2 Ka aynsima hiyeg awna numinuh, giwnkis: “Aa, Kiyavwiye Uhokri kwis miniw giw. Ig yuma gamnihten akiw.”
3 heneme nah ndukwenewa nah kamaxwa pivitit, Kiyavwiye. Pisnewa ka pikiytanisima. Pisnewa numaptenten ariw mbeyne. Pis keh nah ka matak gitkis nuvetunyavu. Pis avanenekwa wagahkis nawaygi.
4 Ku aysaw nah amnihswa git Kiyavwiye inurikyene, igme kaytwa nuwnuh, giwn: “Nah amnihpi.”
5 Nah timapni hene, nah ka aminama akiw, nah dukugis, nah himak kabayhtiwa. Hewke nah kannikaw akiw, mmanawa igwa Kiyavwiye nukavuriwten.
6 Hiyawa ka aynsima hiyeg kiyaganiwhpen adahan nuhmepten, heneme nah ka avis.
7 Kiyavwiye Nuwohkiga, uya amnihun kannikaw gitivutkis! Mmanawa pis biwh gikuveynikis madikte nuvetunyavu pis ikisgikis haritave. Pis pisenwa akak ini gidatnikis ke wotbe pis dunihpiyebe gaybukis.
8 Kibeyne, Kiyavwiye Uhokri dehetniye ignewa amnihkevutne. Ig kehnenekwa kabayka gikakis gihiyegavu.
Sawmu 4
Kit usuh uti kabayka kuri?
1 Kiyavwiye nuwohkiga, uya amnihun kaytwa nuwnuh. Pisnewa wadithebdih nuhawkan. Ku aysaw nah abet mbeyne pis amnihpen. Kuri, nah ayap pit akiw adahan pis amnihun timap nuvigyepkawni.
2 Aa, yis hiyegviyenevwi. Nah wakaymni adahan ku pariye yikehni kane kabay. Aysaw ayivwi adahan yis mahivwihun? Aysaw ayivwi adahan yis awna yuwit waditnevyenen numinuh? Aysaw ayivwi adahan yis awna wasaymka numinuh?
3 Kiyemnabay ku ig Kiyavwiye Uhokri dehetniye avuriw neras ku pariye wewnevwi gikak;
ig timapnan ku aysaw nah amnihswa git.
4 Ku yis ka batek akak pahavwi gihiyakemni, ka yi mwaka kiyimwihwa nikak adahan in ka taraksasevyima. Ku aysaw yis dukugis ivegminanay yihiyakemni ba in akakma kibeyne hiyakemniki kahadbe yis ka kiyimarenama.
5 Kehnabay ku pariye kabaykanen. Ini humaw ke yikanbe git Kiyavwiye Uhokri. Uyay kamaxwa givitit Kiyavwiye.
6 Ay ka aynsima hiyeg awna: “Kit usuh uti kabayka kuri?” Piwnteknewa, Kiyavwiye! Uguhnaba usuh akak pihepka abutni.
7 Pis keh nah batek mpinevevye. Nah ka aynsima batekte giwkis hiyeg ku pariye hiyepnevwi gamutrakis aymuhwa kabayhtiwa.
8 Ku aysaw nah dukugis, nah himak kabayhtiwa. Nah ka kiyimwinama akak ariknawnama. Mmanawa pisnewa ay nukakuh, Kiyavwiye. Pisnewa nukamaxten.
Sawmu 5
Uya huwithan akak pihiyakemni waditye
1 Kiyavwiye, uya ataybiswa numkanit. Timapnaba namnihswan.
2 Nukivara, nuwohkiga, timapnaba namnihswan pit. Mmanawa pitnenwa nah amnihswene.
3 Kiyavwiye, mpuse hawka timap nakuvimna. Mpuse hawka nah piriyepkaw pit. Nah wahap adahan pis iki nayapni nutuh. Nah hiyakni ku pis iki.
4 Kiyavwiye Uhokri, pis ku pariye kane batek hiya hiyeg keh mbayka, hiyeg mabayavye gihiyakemnikis pis ka isaksigkis msakwa pivetun.
5 Pis ka batek hiyap hiyeg ku pariye ikewnevwi hiyakemniye giwntekneswa. Pis amiya hiyeg mbayavye gihiyakemnikis.
6 Pis pisenwa gikakis hiyeg wasaymavye. Pis asene hiyeg umehekevutnevwi gikakis hiyeg kinisekevutnevwi.
7 Nahme ik adahan nah parak pivinekut awaku pis ka pamnihrasima nukakuh. Nah ik adahan nah paberetusaw adahan nah kabayhap akak madikte kiyatka.
8 Kiyavwiye, uya huwithan akak pihiyakemni waditye. Nah kadahan ka aynsima nuvetunyavu ku pariye mwaka nayguhpitni piw. Nah ka hiyak ku samah nuwewni. Uya akki nutuh ku samah pimawkan adahan nah wew.
9 Igkis nuvetunyavu yuma pahatnama giwnkis inyewatma. Avanenekwa abet gihiyakemnikis mbaykanenwa. Igkis kinista hiyeg akak barewye yuwit bawa ini adahan gikinseptenkis ba adahan giwmeptenkis.
10 Kiyavwiye, katiwnihsa gitkis avatra ini gihiyakemnikis. Ini gahegbetawnikis ku pariye igkis ahegbete, keh in wageswa gidahankisnewa akiw. Ivukepnigkis pivetunatak awaku igkis keh ka aynsima patahwaki, igkis siguhpi avanenekwa.
11 heneme, Kiyavwiye, iki batekka gitkis madikte neras ku pariye kamaxwenevwi pivitit. Avanenekwa igkis pak avat akak madikte batekka awaku pisnewa gimaptentenkis. Iki pibetki gitkis neras ku pariye batekyevwi pikak avitakwa giyaknikis.
12 Mmanawa pisnewa, Kiyavwiye, sarayh kabayka givititkis neras ku pariye ihpenevwi piwn; pabay mpithigkis ke wotbe in arabbe gidahankis.
Sawmu 6
Ku aysaw nah tihene, Uhokri timap
1 Kiyavwiye, uya amnihun. Ka ba himahun kihawnama akak mbeyne! Ka ba hiyapkis mbeyne nutuh avatra nutaraksan abetnewa pidagonyi!
2 Amnihnan, Kiyavwiye, mmanawa nah yuma nudatni akiw. Piyihnan, mmanawa katiwka muwaptihpen pahavwite.
3 Kiyavwiye, nah kayah mpinevevye. Aysawki inin mpiyanek?
4 Ba ayta wiwhun abetitak inin mbeyne. Amnihnan, mmanawa pis ka pamnihrasima.
5 Ku aysaw pahavwi miyap ig ka kiyevi akiw. Pariyeki hiyeg kabayhap akiw arikutak imewti?
6 Nah kwis mabiviye tih. Hewke tiyegem nah tihene. Nuwetri sabavitnenekwa awaku nukantak, hawwata nukantak anugha nutiwevwi.
7 Nukanu keh nuwtyak wagewge. In keh nah kabahte ka hiyap akiw. Awaku nuvetunyavu sigimwihpen.
8 Ka sam. Higihwanay nuwntak, yis ku pariye kehnenen mbeyne! Mmanawa ku aysaw nah tihene, ig Kiyavwiye Uhokri dehetniye timapnan.
9 Kibeyne ig kwis timap namnihswan. Ig ameve nuvigyepkawni.
10 Madikte nuvetunyavu marekevwenek. Igkis avisasewnek. Igkis bisikenek pahaye adahan akak madikte gimarankis.
Sawmu 7
Uvetunya igwa tuguhe arikut giteyni
1 Kiyavwiye nuwohkiga, piwntak nah uti nawaygi. Amnihnan mpithan giwkis madikte hiyeg ku pariye nuhareksetni,
2 adahan igkis ka kamaxwenuma pisenwepma nukakuh kewa pahavwi kawokwinebe ig sigkebdihpiye giwin, yumahma pahavwinama hiyeg namnihten.
3 Kiyavwiye nuwohkiga, wake nah inyewatbe keh mbayka, kawkama samkama. Wake nah taraksebe,
4 wake nah katiwnihsebe git pahavwi yumanene gitaraksan nukakuh, wake nah amevwibe nuvetunya gewkanbet waditnevyenen,
5 nikwe ikkam adahan igkis nuvetunyavu haraksevun igkis kamaxwenkama. Ikkam adahan igkis pisenwe nukakuh, ikiswenkama harit waykbo, miyarevye, yuma naymuhwan.
6 Kiyavwiye Uhokri, kavetunsa nuvetunyavu adahan mpithene gidagonyikis mmanawa pis ka hiyepkere inin gidagonyikis. Kannikawnaba. Amnihnan. Mmanawa pis hiyepkere waditkanen amadga inin.
7 Uya hiyak gikakis kurinewa. Pahadguhnaba madikte hiyegviyenevwi pivetunat. Kumadukanigkis ayteke inutak.
8 Mmanawa pisnewa gihivetnikis hiyegviyenevwi ba igkis wadityewatma. Hiyaknaba nukakuh hawwata, Kiyavwiye. Mmanawa nah mpiksewne wew wadit piwtrik, nah inyewa wewkere akak pihiyakemni.
9 Pisnewanaba akak madikte mbayavye gihiyakemnikis! Ikinaba kabayka gitkis madikte wadityevwi. Mmanawa pisnewa waditka akivara. Pisnewa ku pariye uhivetni ba uhiyakemni wadityewatma.
10 Ignewa Kiyavwiye Uhokri numaptenten. Ig amnih ku pariye waditye.
11 Ku aysaw ig hiyekne gikakis hiyeg ig ka taraksatiy. Mpuse hawkri ig ekkevye hiyeg gitaraksankis.
12 Ku igkis ka miniwkere ariw gitaraksankis, nikwe Kiyavwiye Uhokri kiyawasa giwana ig pisenwe gikakisnek. Gimedga kwis ah adahan gihapseptenkis akak giyaka.
13 Ig kwis ahegbet akak giyakok pahayutniye. Ig kwis ahegbet adahan haviswiye giyaka ku pariye kadahanene tiket gukigsa.
14 Ivegnay ku samah hiyeg mbayavye kehbeta mbayka. Igkis ahegbeta matekbetka hawwata wasaymkanen gannivwikis.
15 In ke wotbe igkis atiknebe wayk adahan kehne tey. Bawa igkisnewa tuguhpiye atere arikut ini giteynikis.
16 hene ini gimebyemnikis dyuhe givititkiswa akiw. Nikwe igkis uti inwata mbeyne.
17 Nahme kibeyhenenekwa Kiyavwiye giw. Mmanawa ignewa waditye. Nah peknenekwa adahan kibeyhene ku pahavwi avitminene madikte.
Sawmu 8
Kiyavwiye Uhokri kumadukasa inin hawkri gitkis hiyeg
1 Kiyavwiye, pisnewa uwohkiga. Pisnewa ka pikiytanisima. Piw kabayhaka muwapuw amadga hawkri. In kabayhaka hawwata ayhte inurik.
2 Pis keh bakimnayh nopsanyovwinene ignes kabayhap kabayhtiwa payak gikakis bakimnayh nukuvisniyevwi. Pivetunyavu ka hiya gisamanakis. Madikte hiyeg ku pariye kavetunsap, ignes msakwa tinwovu gitivutkis.
3 Ku aysaw nah sarayh nuvegyi inurikut nah hiya pikehavan ayge. Pisnewa iki kayg akak warukma mpuse giwetrikis.
4 Kiyavwiye Uhokri, pariyeki usuh pit, usuh amadgayavu inin, adahan pis kiye usuh? Usuh amadgayavu inin, usuh ka ariknawnama pit adahan pis iki pitew womkanit.
5 heneme, kibeyne, pis ike wotuh ka aynsima wannu, ka aynsima ukiytani. Pis kehe ukiytani warikap aynesa giwkis anj gikiytanikis.
6 Pis kumadukase madikte ariknebdi wotuh:
7 muwtohvyenevwi akak pakviyenevwi, hawwata puwiknevyene ahavwikunevwi akak
8 kuhivraviyenevwi, akak madikte ku pariye msekwenevwi parahwokwa, pis ike madikte uwakurit.
9 Kiyavwiye, pisnewa nuwohkiga. Pisnewa ka pikiytanisima. Piw kabayhaka muwapuw amadga hawkri.
Sawmu 9
Kibeyne, Kiyavwiye Uhokri parak abet nuhawkan
1 Kiyavwiye, nah kabayhap akak madikte nubetki. Nah kinetihwekere amin madikte pikehni kabayka.
2 Ku aysaw nah kiyevi nuyakni bateke. Nah avanenekwa batek pikak. Nah pak adahan kibeyhene piw avanenekwa. Pisnewa nuwohkiga. Pis avitminene madikte ndahan.
3 Ku aysaw pis parak abet nuhawkan, nuvetunyavu bisik, igkis tuguh, igkis miyarap.
4 Pisnewa ivegbetene hiyeg gihiyakemnikis. Pis waditye. Pis kane taraksa. Pis kumadukigkis akak madikte waditka. Kibeyne ku samah pis pareke abet nuhawkan.
5 Pis himehe hiyegviyenevwi ku pariye kane ihpa piwn. Pis pisenwe akak hiyeg mbayavye gihawkankis; pis miyehkise giwkis gitkis hiyeg.
6 Pis keh uvetunyavu yuma giwskekrikis akiw; pis pisenwe akak adahan avanenekwa, hawwata igkis ka kiyekan akiw.
7 heneme pisme, Kiyavwiye, pis kumadukene adahan avanenekwa. Pis bat amadga pevwi adahan hiyekne gikakis madikte hiyeg.
8 Pis kumaduka hiyeg akak waditka. Pis hiyapkis gitkis pakeku akak ku samah gikehnikis.
9 Kiyavwiye, pis hawwata humaw ayemweket gidahankis hiyeg ku pariye haraksepka. Pis mpithigkis avim ini ku aysaw igkis abet mbeyne.
10 Ku pariye hiyeg hiyakpi ignes kamaxwa pivitit. Mmanawa pis ka miniwnama giwkis hiyeg ku pariye amnihswene pit.
11 Nukebyuvwi, paknay kabayka gidahan Kiyavwiye Uhokri dehetniye ku pariye kumadukene Jerusalém! Akkanay gannu gitkis hiyegviyenevwi muwapuw amadga hawkri!
12 Mmanawa Kiyavwiye Uhokri avuriw ku pariye hiyepnevwi mbeyne. Ig ka miyeh gamnihswankis. Ig hiyapkis mbeyne gitkis neras ku pariye giharakseptenkis.
13 Kiyavwiye, amnihnanuba! Iveg ku samah namiyetnivwi hiyapkis mbeyne nutuh! Nah abet miyaka, Kiyavwiye. Uya wiwhun ayteke
14 kahadbe nah ik adah tabira givetunkis Jerusalémyenevwi adahan nah ekkene gitkis mmahki nah kabayhap hawwata adahan awna gitkis ku nah bateke numinuh awaku ku samah pis wiwhpen ariw miyaka.
15 Hiyeg ku pariye kane wewkere akak Kiyavwiye Uhokri gihiyakemni, igkis pisenwepka gikakisnek*. In ke wotbe igkis tuguhbetwikisbe arikut inwata miyokwiye ku pariye gatiknikis. Igkis ahegbete pahat tey, ayteke igkiswa tuguhbet arikut.
16 Avim ini ig Kiyavwiye Uhokri dehetniye metakwa ig hiyakan ku ig waditye. Igkisme mbayavye igkis tuguhbetwikis arikut gidahankiswa giteynikis.*
17 Hiyeg mbayavye payak gikakis madikte hiyeg ku pariye kane aminama giw Kiyavwiye Uhokri, aysawnemenek igkis madikte tivik arimkat miyaka.
18 Ignesme hiyeg madiptavye avim ini igkis avuriwka kabayhtiwa. Yuma pahavwinama gaytakis miyehka akiw. Neras ku pariye hiyepnevwi mbeyne kuri avim inin, aysawnemenek madikte ku pariye igkis aharitne in ka mpithaka giwkis akiw.
19 Kiyavwiye, kannikawnaba. Ka ba isaksa awaykemni ikaw awaygtema mpiyap. Iwapnigkis pivetunat adahan pis hiyak gikakis.
20 Kiyavwiye, keh igkis avis pibohri kahadbe igkis hiyak ku igkis he awaykemninen, igkis ka ariknawnama pit.
Sawmu 10
Piriyepkawka adahan ayepne ayavasawka
1 Kiyavwiye, mmahki pis piyawakad giwkis pihiyegavu? Mmahki pis ayemwe giwkis ku aysaw igkis abet kiyimwiki?
2 Neras mbayavye igkis ikaw avitmin madikte hiyeg. Igkis arewha gitkis hiyeg ku pariye yumanene gawaygikis gitivutkis. Uya keh igkis tuguhe arikut giteynikiswa!
3 Igkis mbayavye keh giwantikis akak gimawkankis ku pariye igkis kehkere. Ku pariye hiyeg kotyakuvye ig ka aminama giw Kiyavwiye Uhokri. Ig he awnevi hiyakemniki ku pariye adahannen mahivwihne Kiyavwiye Uhokri.
4 Pahavwi hiyeg ku pariye mbeyevye gihiyakemni ig ka hiyekere ku Kiyavwiye Uhokri ay. Git igwo kumaduka ay. Git Kiyavwiye Uhokri yuma ay.
5 Madikte ku pariye ig keh in humaw kabayka gidahan. Ig ka hiya igma pukuhpa Kiyavwiye Uhokri gikumadukan. Ig ikaw datte giwkis givetunyavu.
6 Ig awna gitwa: — Nah ka biyuksatiy nudatni. Nah ka hiyaptiy mbeyne.
7 Gibiy kivun akak wasaymka akak ibitahaki akak puwimahka. Ig he awna amin arewhakinen akak amin mbayka.
8 Ig kadasa hiyeg kibeynevwi kennesa arit paytwempu adahan giwmeptenkis.
9 Ig kadasa hiyeg ke kawokwinebe amun gayemwekri. Ig iveg gimkatkis hiyeg ku pariye yumanene gimaptentenkis. Ig kadasa ig waha giwin adahan ig umehne. Nikwe ig kamax giwin ariku giteyni, ig tivikevgi givinwat.
10 Igme giwin dunihbet, ig miyavup. Ig hahwa awaku ner givetunya ka gidatnisima.
11 Igme awna gitwa: — Kiyavwiye Uhokri ka aritnama ariw inin. Ig manan, ig ka hiyap ariknawnama.
12 Kiyavwiye, kannikawnaba. Hiyapkis git ku pahavwi mbeyvye akak piwak detye. Ka ba miyeh neras ku pariye ay giwaku. Igkis yumanene gimaptentenkis giw!
13 Mmahki ig awayg mbeyvye kiboka ikaw ke wotbe yuma Kiyavwiye Uhokri aybe? Mmahki ig awna abet gihiyakemni: — Kiyavwiye Uhokri ka dyuhkis gihiyegavu gimigkis?
14 heneme pisme, Kiyavwiye, pis hiyap pihiyegavu gihivankis mbeyne. Pis hiyap gikadnikis. Nikwe pis ahegbet adahan gayavetnikis avanenekwa akak piwak detye. Igkis mabimnavye kamaxwa pivitit mmanawa avanenekwa pis ayavigkis akak gimawkankis.
15 Kiyavwiye, aysawhka kuri pisenwa akak mbayavye gidatnikis. Hiyapkis gitkis pekeku akak gihiyakemnikis amebyemni. Ka ba isaksin mpiya henenwatma.
16 Kiyavwiye, pis ikivarat adahan avanenekwa. Hiyeg ku pariye kane ihpekere piwn igkis tukuhavepkanek ariw piwetri.
17 Kiyavwiye, pis timap givigyepkawnikis neras ku pariye tuwatasewnevwi pitivut. Pis iki gawaygikis.
18 Pis timap gayavasawnikis neras ku pariye hiyepnevwi mbeyne, neras ku pariye migenavye. Pis parak abet gihawkankis adahan gimaptentenkis kahadbe neras hiyeg amadgayavu inin ka takunima keh aviska gikakis.
palikur 